( يا ربيــــع ) الشاعر رفعت أبو العلا -- تحياتي جدو عبدو

( يا ربيــــع )

ـــــــــــــــــــــــــــــ

ياربيع .. قول لزهــُورك // تخبّي جَمَالها عَنّي

دا نَسيمَك ويّا عُطورَك // بيخلّــوا الدُنيا تغنّي

وانا قلبي م بَقَاش .. مِتهنّي

لَ زهورك .. تِفَـرّحني // ونَسِيمَك .. بيجْرَحني

وعُطورَك .. بتِمنَحني // إحساس .. غَصْب عَنّي

والفرحه .. بعيده عنّي

دا انا قلبي مليان جِراح // ما يداويها أي جَــرّاح

والعُمْر سَرَقني ، وراح // وما عِشت يوم مِرتاح

وتعِبت من التَمَــنّي

ياربيع .. ماليش حبيب // يمنَحني مُتعة وجـُـودَك

قوللّي إمتى تجيب لـ // ي فرحه ، وتُوفي بوعودَك

وتقول للدُنيا : تحِــنّي ؟؟

وباشوف كِتير أحباب // عايشين يتغَنّوا بجمالَك

ماداقوا لحظة عذاب // ودايب فيهم وصـــالَك

وصالهُم ليه ... ماوَصَلني ؟؟

ورودَك..مِداريه خُدُودها // ونسيمَك .بينكِر وجودها

وعبيرها..استخَبَّى فى عودها // وكارهه إنّي آخُدها

دا مِنها ، والاّ دا مِنّي ؟؟؟

ياربيع .. يانبع الهنا // فيه ناس ربيعها سنه

وناس .. كده زيّي أنا // ربيع حياتهم .. غُنــــا

وما يشوفوا إلا التَجَنّي

والصبر في المواويل // بيخَفّف الهَمّ التِقيل

ويقَصّر اللّيل الطويل // وانا قلبي دايماً عَليل

باحتار .. لو عَنَّك سألني ..!!

وانتَ يافَرْح الحَبايب // بحُسنَك ليه عنّي غايب ؟

وإمتى ح يبقى لي نايب// ينَسّيني شَعري اللّي

شايب

ويجيني الحَظ مِتحَـــنّي ..؟

ياربيع لمّا انتَ مخاصِمني // ورودَك ليه بتغازِلني ؟

والاقي الدُنيا تحايلني // وطريق الأماني يشيلني

لِفُوق ، وانتَ تخَايلني ؟؟

أنا قلبي ما يتحَمِــّل // جمالَك لمــّا تِتجَمّل

بالاقي روحي تِتأمِّل // ياتِبعد عَنّي .. ياتكَمّل

مِشوارَك ، وادَوّقك فَنّي

صدّقني ح اورّيك عجايب // دا الشُوق جُوّايه دايب

وح نِبقى انا وانتَ قرايب // ويمكِن نِبقَى حبايب

صَدّقني ، ودَه ...( وَعْد مِنــّي )

****************************

الشاعر رفعت أبو العلا